Chorausflug 15. August 2026

Chillechor Ettigä 2026
Es Usflugs-Erinnerigsvärsli
 
Am Morge früe wenn d Sunne lacht
hei mir uns uf d Sogge gmacht
um unsere Usflug eimol meh
programmgemäss in Agriff z‘ neh.
Früezytyg bereit – wie wunderbar
stoht dr Arleser Reisecar.
Elegant mit Krawate, wie ne änglische Sör,
begrüesst uns dr Lui – unsere Car-Schofför.
Dur ’s morgendligi Verkehrsgewühl
fahrt är uns sicher bis zum Kaffi z‘ Schönbüel.
Dört hei mir gnueg Zyt zum diskudiere
ob Höggle - oder Strigge zum Zil duet füere.
Dr Küstlere ihri Telifon-Uskunft ergit,
dass es nur dur ‘s Höggle sone  Kunstwärg git!
              Do chömme vermuetlig nit alli druss -
              doch für die wo ’s wüsse, isch es e Gnuss.
Nach däm Käffeli sitze alli wider gärn            
in Bus, ‘s got nämlig witer in Richtig Bärn
und denn in ’s Bärner-Oberland
wo mir g’mäss Programm mitenand
ändlig emol möchte singe -
es soll schints guet in sällem Chilchli klinge.
Dr Lui isch immer voll drbi
är zeigt uns d Schwizer-Geografi.
Stockhorn, Niese und denn au
dr Eiger, dr Mönch und d Jungfrau.
Ab Interlagge goht ‘s bärguuf -
unsere Bus brucht zimmlig Pfus,
doch är meischteret jede Rangg -   
unserem Bus-Schofför sei Dangg.
Obe acho in Habkärn
verlön mir denn dr Bus ganz gärn,
denn ändlig dörfe mir jetz wider
stregge unseri stiife Glider.
Mir stige dört zum Chilchli ufe
und chöme doch e chli in ’s Schnufe.
Me wünscht, dass alli uf d Stäge stöhn,
bevor mir in d Kapälle gön.
Und dass me cha e Foti mache,
sotte au alli e bitzli lache.
S het sicher jede si Vergniege,
söt är ämol sone Fotteli griege(?).
              (Die Meischte warte jo im Stille
              no uf d‘ Fotene in dr Ettiger Chille!)
 
Was mir jetz sehn, sind anderi Wälte.
Im Verglich zu unsere Kirche, sälte.
D‘ Orgele isch do über em Altar -
für uns doch e Bitzli sonderbar. 
 

D’ Christina jedoch zeigt uns dass
musiziere au e so macht Spass.
Si duet solistisch so brilliere
und cha uns drmit motiviere,
dass unser chorisches Singe
d Tatiana drzue tuet bringe
z‘ probiere
unser Bemühe z‘ honoriere.
Mit e me lachendem Nigge isch ihre das glunge.
Also hei mir wohrschints nit so schlächt gsunge!
Dr Applaus het zeigt – i mach e Wett,
dass es au no Publikum gha het.
 
Spöter hei mir uns per Car nach obe
ins Gaschthuus Alperose verschobe.
Das isch e Adräss – die muess me sich mergä
Dört cha me sich erschtklassig trängge und stergä.
Si sind dört sehr professionell und fründlig drzue
und es git für jedä ganz sicher gnue.
Dört obe hän si, was uns fehlt wägä dr Hitz:
saftig grüeni Matte – jä Si - das git ‘s!
Denn goht ’s per Bus an Brienzersee -
no vyl anderi Lüt wänn das Schiffli neh!
In Brienz tuet uns dr Lui erwarte.
Är will drum bi Zyte Richtig Brünig starte.
Vo Brienz us seht me dunggli Wolge stoh,
drum isch es au so düppig do.
Die Wolge  gänd für d Bärgä Rägä
Au bi uns wäre die sicher e grosse Sägä!
So fahre mir in einer Ruhe
zügig in Richtig Luzärn zu
Dört git ’s bi Emmebrugg ä Gwitter
dr Rägä schüttet in Hektoliter
doch nit lang – ‘s isch schnäll verbi
schön wär ’s, ’s chönnt in Ettigä si.
Doch dä Wunsch, dä isch vergäbä.
Denn au hüt git ’s in Ettigä kei Rägä.
Jetz möchte alli heimzue go.
Sogar au ohni dr Apero.
Au im Lui isch es egal
Är fahrt si Auto gärn heim in Stall
Mir Singendi sehn uns jo gottlob,
am Donnschtig wider in dr Prob.
 
 
 
 
                                                                       ToMe/ 16.08.2026